Mediat ndërkombëtare kanë kthyer vëmendjen kah Kosova, pas arrestimit dhe konfirmimit të aktakuzave ndaj ish-liderëve të Ushtrisë Çlirimtare të Kosovës nga Dhomat e Specializuara.
Agjencia e lajmeve Reuters e ka nxjerrë në ballinë lajmin se presidenti Hashim Thaçi ka dhënë dorëheqje, menjëherë pasi prokuroria e Hagës ka konfirmuar se është njëri prej të dyshuarve për krime lufte. Edhe agjencia amerikane e lajmeve, Associated Press, ka raportuar lajmin me titullin “Presidenti i Kosovës jep dorëheqje që të përballet me akuzat për krime lufte”.
Dy mediumet e mëdha botërore kanë publikuar edhe xhirime të përmbledhura të aktiviteteve të Thaçit prej kohës sa ishte udhëheqës i Drejtorisë Politike të UÇK-së deri te shpallja e pavarësisë.
Edhe BBC-ja britanike ka shkruar se lideri i Kosovës ka dhënë dorëheqje, për shkak të akuzave për krime lufte.
Zhvillimet rreth Thaçit e Veselit në Kosovë kanë qenë të enjten edhe në fokus të mediave serbe.
Edicioni në gjuhën serbe i Radio Evropës së Lirë ka dalë me titujt “Thaçi ka dhënë dorëheqje nga posti i presidentit të Kosovës, shkon në Hagë” dhe “Konfirmohet aktakuza kundër Kadri Veselit”.
Ndërkaq në portalin e agjencisë “B92”, lajmi është dhënë me titullin “Thaçi u dorëzua”. “Blic”-i në ballinë ka pasur titujt: “Thaçi shkon në Hagë: I konfirmohet aktakuza, presidenti kosovar jep dorëheqjen”.
Një ditë më parë, mediat ndërkombëtare raportuan edhe për bastisjen dhe arrestimin e ish-zëdhënësit të UÇK-së, Jakup Krasniqi.
“Politikani veteran është arrestuar nga policia e armatosur rëndë gjatë bastisjes në shtëpinë e tij në periferi të Prishtinës”, ka shkruar “Al-Jazeera” në shkrimin e titulluar, “Arrestohet i dyshuari për lufte në Kosovë, Krasniqi dhe dërgohet në Hagë”.
Për arrestimin e Krasniqit ka raportuar më gjerësisht edhe agjencia e amerikane e lajmeve, AP.
Edhe Reuters ka raportuar se si Krasniqi është arrestuar dhe se është transferuar në Hagë, ku ndodhen Dhomat e Specializuara. Të dy mediumet theksojnë se gjykata vepron nën juridiksionin e Kosovës, porse ka prokurorë e gjyqtarë ndërkombëtarë. Mediat e huaja kanë raportuar edhe ngritjen e aktakuzës ndaj Rexhep Selimit.
