Deputetja e PDK-se Arbnora Salihu ka njoftuar se propozimi i saj për zgjerimin e fushëveprimtarisë së Komisionit për Kulturë, Turizëm dhe Sport, duke përfshirë edhe Rininë, është miratuar me shumicë votash.

Sipas saj, kjo kërkesë është ngritur që në mbledhjen e parë dhe të dytë të komisionit, pasi në asnjë komision parlamentar nuk ishte e përfshirë Rinia si fushë e veçantë trajtimi.

Ajo ka theksuar se, megjithëse ish-Ministria e Kulturës, Rinisë dhe Sportit është ndarë në dy ministri – Ministria e Kulturës dhe Turizmit dhe Ministria e Sportit dhe Rinisë – në nivel parlamentar mungonte trajtimi i drejtpërdrejtë i çështjeve që lidhen me të rinjtë, duke krijuar kështu një boshllëk institucional.

Me ndryshimin e emërtimit dhe plotësimin e mandatit të komisionit, Rinia tashmë do të jetë pjesë e agjendës parlamentare.

Salihu e ka cilësuar këtë vendim si të domosdoshëm për të reflektuar realitetin institucional dhe për të garantuar që politikat për të rinjtë të kenë vëmendjen dhe trajtimin e merituar.

“Ky ndryshim është i domosdoshëm për të reflektuar fushëveprimin real të komisionit dhe është garancë që politikat për të rinjtë do të jenë pjesë e agjendës parlamentare”, ka shkruar Salihu./FrontOnline/