28 komuna në Kosovë i kanë zgjedh tashmë kryesuesit e Kuvendit Komunal.

9 prej tyre akoma jo. Megjithatë, 6 nga ky grup veçse i i kanë thirr tashmë mbledhjet për diçka të tillë, shkruan “Front Online”.

Podujeva e Parteshi më 29 dhjetor 2021. Me të 30-in Mamusha, Vitia e Dragashi. Gjilani e ka lënë më 5 janar të vitit tjetër, 2022.

E janë tri komuna që s`kanë ndërmarrë ndonjë veprim për zgjedhjen e Kryesuesit të kuvendit: Istogu, Prishtina dhe Kllokoti.

Këto 9 komuna kanë afat ta kryejnë këtë punë brenda afatit ligjor, 30 ditësh, i cili nis të rrjedh nga dita e mbajtjes së mbledhjes inauguruese.

Në të kundërtën, të gjitha asambletë e tyre konsiderohen jofunksionale dhe shkohet prapë në zgjedhje për këshilltarët e rinj komunalë.

Krejt këto të dhëna i ka bërë të ditura për “Front Online”, Ministria e Administrimit të Pushtetit Lokal (MAPL).

“Marrë parasysh që Ligji 03-L/040, për Vetëqeverisje Lokale në Nenin 50.2 paragrafi a) ka përcaktuar që Kuvendi i Komunës konsiderohet jo funksionues nëse nuk e zgjedh kryesuesin, tridhjetë (30) ditë pas themelimit atëherë për komunat e lartcekura të cilat janë ne proces apo ende nuk kanë thirrur mbledhjet për zgjedhjen e Kryesuesit të kuvendit afati i të cilave lidhet më mbajtjen e mbledhjes inauguruese në vijim për secilën komunë paraqesim datën e mbajtjes së mbledhjes inauguruese si dhe afatin deri kur kuvendet e këtyre komunave duhet ta zgjedhin Kryesuesin e Kuvendit të Komunës”, thuhet në përgjigjen e MAPL-së.

Sipas saj,  Parteshi, ka afat veç deri më 31 dhjetor të këtij viti ta zgjedh kryesuesin.

Komunat tjera edhe në disa ditë më shumë.

Mamusha e Podujeva deri më 2 janar. Istogu e Vitia deri më 5.

Prishtina deri më 6 janar. Gjilani më 8. Dhe Dragashi më 13, meqë e mbajti mbledhjen inauguruese më së voni shkaku i certifikimit të vonshëm të rezultateve.

Dje gjatë ditës “Front Online” ka kontaktuar me taborret udhëheqëse në Prishtinë e Podujevë.

Përsëritjen e zgjedhjeve për asamble në Prishtinë e përjashton Fadil Aliu, asambleist i zgjedhur nga radhët e LDK-së.

Ky thotë se do t`i sigurojnë përmes koalicioneve 12 votat shtesë që u duhen për zgjedhjen e kryetarllëkut të kuvendit komunal.

“Shpejt do të thirret seanca, besoj këtë javë. 51 ulëse i ka Kuvendi, 26 nevojiten. I kemi 14. Do t`i sigurojmë tjerat vota me koalicione. Po, po do të bëjmë koalicion. Por s`mund të flas se me kënd”, u shpreh ai për “Front Online”.

Në Podujevë nuk janë kaq të sigurt.

Një asambleist nga VV-ja e ka lënë të hapur mundësinë e shkuarjes në zgjedhje për asamble.

“Më 29 dhjetor e kemi seancën. Nuk e di. Nëqoftëse partitë arrijnë marrëveshje besoj që nuk ka zgjedhje. Nëse jo duhet me shku në zgjedhje. Për momentin s`ka diçka konkrete. 13 vota i kena. Për me arrit shumicën na duhen 18”, u shpreh për “Front Online” asambleisti që deshi të mbesë anonim.

/Front Online/