Manchester City nuk do të ndalojë përgatitjet as gjatë ditëve të festave. Trajneri Pep Guardiola ka konfirmuar se skuadra e tij do të stërvitet edhe në prag të ndeshjes së Premier League kundër Everton, e cila zhvillohet të enjten në kuadër të ‘Boxing Day’.

“Ne do të stërvitemi sot pasdite dhe nesër në mbrëmje. Pas seancës së sotme, lojtarët do të kalojnë kohë me familjet e tyre dhe nesër në mëngjes gjithashtu. Më pas do të rikthehemi në stërvitje dhe shpresoj që të gjithë të jenë të fokusuar sepse është detyra jonë”, ka deklaruar Guardiola.

Manchester City po përballet me një periudhë të vështirë në kampionat. Pas shtatëmbëdhjetë javësh, kampionët në fuqi gjenden vetëm në vendin e shtatë në tabelë, duke ushtruar presion mbi ekipin për të rikthyer formën dhe rezultatet pozitive./RTK