Manchester United janë gati të pranojnë një ofertë prej rreth 40 milionë funtesh për Alejandro Garnachon, sipas raportimeve të The Telegraph, me reprezentuesin argjentinas që është një nga disa lojtarët që trajneri Ruben Amorim ka vendosur t’i largojë nga planet e tij. 

Sulmuesi 21-vjeçar më parë ishte vlerësuar deri në 70 milionë, por interesi në rritje nga rivalë të Premier League mund të çojë në një largim me çmim më të ulët këtë verë. 

Garnacho nuk është përfshirë në turneun parasezonal të skuadrës në Shtetet e Bashkuara, së bashku me emra si Jadon Sancho, Antony, Tyrell Malacia dhe Marcus Rashford, ky i fundit pritet të bashkohet me Barcelonën në formë huazimi. 

Chelsea, Aston Villa dhe Tottenham Hotspur thuhet se po ndjekin nga afër situatën e tij, me lojtarin që preferon të qëndrojë në Ligën Premier. 

Ruben Amorim po bën një riformatim të thellë të skuadrës dhe klubi është i gatshëm të pranojë edhe humbje financiare për të mbështetur projektin afatgjatë të trajnerit portugez. Shitja e Garnachos shihet si pjesë e një valë largimesh që pritet këtë verë. 

Garnacho kishte tërhequr interes të madh nga Chelsea dhe Napoli edhe në janar, kur vlerësohej rreth 70 milionë. 

 Por me trajnerin Amorim që tashmë ka deklaruar qartë se argjentinasi nuk bën pjesë në planet e tij, largimi i tij duket pothuajse i pashmangshëm.