Manchester City është shpallur edhe matematikisht kampion i Premierligës për edicionin 2020/2021.

“Qytetarët” triumfuan në Premierligë tri xhiro para fundit, për shkakun se Manchester Unitedi i vendit të dytë pësoi 1-2 në shtëpi nga Leicester City.

Ky titull i kampionit është i veçantë edhe për trajnerin e Cityt, Pep Guardiolën i cili ka barazuar një rekord me trajnerin Arsene Wenger dhe Jose Mourinho.

Tre trajnerët në fjalë tashmë kanë nga tre tituj të kampionit në Angli, ndërkohë vendin e parë e mban bindshëm Sir Alex Ferguson që ka triumfuar 13 herë në elitën e futbollit anglez si trajner.

Ndryshe, ky është trofeu i 8-të i Premierligës në histori të Manchester Cityt.

Manchester City është në garë për të fituar Ligën e Kampionëve pasi luan në finale kundër Chelseas.