Futbollisti kosovar do ta përfaqësojë shtetin aziatik në kualifikimet e Botërorit 2022. Ish-përfaqësuesi i Kosovës ftohet për herë të parë te Malajzia, derisa paraprakisht kishte luajtur për “Dardanët”

Liridon Krasniqi do ta nisë një eksperiencë të re në një Kombëtare të re.

Në fakt, ish-përfaqësuesi kosovar është ftuar në Kombëtaren e Malajzisë.

Selektori Tan Cheng Hoe e ka zbuluar sot listën e 25 futbollistëve të cilët do të jenë pjesë e ekipit për tri ndeshjet e mbetura të rundit të dytë kualifikues për Botërorin 2022, regjioni i Azisë.

Dhe, në mesin e tyre shihet edhe emri i Krasniqit.

Pasi nuk e ka zhvilluar asnjë ndeshje zyrtare me Kosovën dhe pasi qëndroi 5 vjet në Malajzi, ku luajti me mjaft sukses, mesfushori kualitativ u pajis me pasaportë të Malajzisë dhe tash ka të drejt ta përfaqësojë këtë vend.

Aktualisht, futbollisti shtatlartë është pjesë e ekipit Neëcastle Jets në kampionatin australian.

Malajzia do të përballen me Emiratet e Bashkuara Arabe më 3 qershor, me Vietnamin më 11 dhe me Tajlandën më 15 qershor.