Presidenti francez Emmanuel Macron tha se tarifat e presidentit amerikan Donald Trump janë një “tronditje për tregtinë ndërkombëtare”, duke thënë se do të kenë një “ndikim masiv” në ekonominë evropiane.

“Vendimi që u njoftua mbrëmë është një vendim brutal dhe i pabazuar”, thotë ai, duke shtuar se ekonomia amerikane dhe konsumatorët do të dalin “më të varfër dhe më të dobët”.

Bashkimi Evropian është ndër ata që u goditë më së shumti nga tarifat e Trumpit, shefja e BE-së, Ursula von der Leyen, i quajti tarifat e Trumpit një “goditje të madhe për ekonominë botërore”.

Trump vendosi tarifa bazë prej 10 për qind ndaj të gjitha vendeve që shesin mallra në SHBA, përfshirë këtu edhe Kosovën e Shqipërinë, e për disa tjera, me të cilat vendi i tij ka deficit ekonomik e tregtar, taksat i ngriti deri në 34 për qind, si në rastin e Kinës, 20 për BE-në e 24 për Japoninë.

Presidenti tha se e mori këtë vendim pasi vendet dhe ekonomitë tjera përfituan shumë nga Shtetet e Bashkuara, të cilën, siç deklaroi, e shkatërruan shumë.

Trump tha se tarifat që po i vendos janë reciproke, të cilat i shpjegoi me fjalinë e thjeshtësuar “ata na bëjnë neve, ne ua bëjmë atyre”, shkruan BBC, transmeton Klankosova.tv.