Nesër do të zhvillohet ndeshja e parë gjysmëfinale e Kupës së Kosovës mes Prishtinës dhe Llapit.

Në stadiumin “Fadil Vokrri” në Prishtinë, kryeqytetasit janë nikoqirë të Llapit të Tahir Batatinës, raporton FrontOnline, raporton FrontOnline.

Në këtë ndeshje, Llapi do të hyjë me të gjitha forcat dhe e motivuar më shumë se kurrë.

Kjo për faktin se kjo ndeshje është jetike për djelmoshat nga Podujeva, të cilët e duan kualifikimin në garat evropiane përmes triumfit në Kupën e Kosovës.

Trajneri i Llapit, Tahir Batatina në një prononcim për FrontOnline ka thënë se ndeshja në fjalë do të jetë e vështirë, por që objektiv i tyre i vetëm është triumfi.

“E dimë se është jetike kjo ndeshje për Llapin. Do të jetë e vështirë ndaj Prishtinës, por siç e dini ne e kemi objektiv kupën. Jemi përgatitur maksimalisht dhe duam rezultat pozitiv ndaj Prishtinës për të kaluar në finale”, ka thënë Tahir Batatina, duke vazhduar:

“Do të jetë një ndeshje e vështirë pasi Prishtina është në formë të lartë. Në ndeshjen e fundit kemi pushuar disa futbollistë për të qenë sa më të gatshëm. Sa i përket kundërshtarit, do të mundohemi ta shfrytëzojmë lodhjen e tyre në ndeshjen e fundit ndaj Ballkanit, por do të jetë e vështirë”.

Sa i përket disponueshmërisë së skuadrës, Batatina thotë se nuk ka asnjë mungesë, derisa për kapitenin Mentor Zhdrella tregon se nuk është në 100 përqindshin e tij pas lëndimit që ka pasur së fundmi.

“Jemi të kompletuar si skuadër, nuk kemi ndonjë mungesë, teksa Mentor Zhdrella tash për tash nuk është në 100 përqindshin e tij”, e zbulon trajneri llapjan.

Llapi që njihet si klub që jep premio për futbollistët në ndeshjet e rëndësishme, edhe kësaj radhe pritet ta bëjë një gjë të tillë.

“Për çdo ndeshje të rëndësishme ka premio, nesër do të vendosë kryesia pas një takimi. Edhe ndaj Ballkanit dhe Trepçës ’89 ka pasur premio. Do ta shohim nesër se sa do të jetë shuma”, përfundoi të martën për FrontOnline Tahir Batatina.

Ndryshe, Prishtina dhe Llapi janë takuar tri herë mes vete në kuadër të Kupës së Kosovës.

Në një takim, Llapi kishte dalur fitimtar, kurse në dy të tjerat, Prishtina u tregua më e mirë duke fituar.

Ndeshja e nesërme mes Prishtinës dhe Llapit zhvillohet nga ora 15:00.

Në këtë ndeshje, drejtësinë do ta ndajë gjyqtari Shpëtim Murtezi, i dnihmuar nga Fatlum Berisha, Bujar Selimaj dhe Selim Isufi./FrontOnline/