Pas qetësimit të situatës nga pandemia Covid-19, ka filluar të rishfaqet sëmundja ngjitëse tek fëmijët e njohur si lija e ujit (varicela).

Infektologët thonë se dimri dhe pranvera janë stinët kur kjo sëmundje përhapet më shumë tek fëmijët e sidomos në kopshte dhe shkolla.

Por pavarësisht kësaj, numri i rasteve të të prekurve me lijën e ujit në Kosovë është i vogël.

Ushtruesi i detyrës së drejtorit të klinikës Infektive në QKUK , Arben Vishaj, për FrontOnline, tha se në këtë klinikë janë vetëm dy fëmijë që janë të prekur me lijën e ujit.

“Në infektivë janë dy fëmijë që janë të prekur me lijën e ujit, mosha e tyre është rreth dy vjeç” tha shkurt Vishaj për FrontOnline.

Për trajtimin e lijës së ujit ( variacelës) kanë folur për FrontOnline edhe nga Ministria e Shëndetësisë.

Ata thonë se vaksinimi kundër kësaj sëmundje nuk është në programin e rregull të vaksinimit.

“Varicela është një sëmundje ngjitëse e zakonshme tek fëmijët, veçanërisht të atyre nën moshën 12 vjeçare, që shkaktohet nga një virus (varicella-zoster) dhe me që nuk është një sëmundje me përhapje të larte apo rrezikshmëri të lartë, tek ne nuk përdoret profillakse specifike dhe nuk është pjesë e programit të rregullt të vaksinimit”, thuhet në përgjigjen e tyre.

Por në rast së ka raste më të rënda të të prekurve me varicela, nga MSH-ja kanë thënë se përdorën barna kundër alergjisë ose edhe ndonjë  antiviral.

“Trajtimi i saj zakonisht është simptomatik për rastet e lehta, ndera për raste më të rënda përdoren antihistaminikët (barna kundër alergjisë) sistemik ose në raste më të rënda këshillohet edhe ndonjë  antiviral si psh. Acuclovir, por jo antibiotik”, thuhet në përgjigjen e tyre.

Simptomat e lisë së ujit janë janë kokë dhimbje e lehtë, temperaturë e lehtë, lodhje apo paraqitje puçrrave të vogla në lëkurë.

Nga kjo ministri iu bëjnë thirrje prindërve që të mos i anashkalojnë këto simptoma dhe t’i dërgojnë fëmijët të mjeku.

“Prindërit në  çdo rast kur vërejnë simptoma të fëmijët siç janë kokëdhimbje e lehtë, temperaturë e lehtë, lodhje apo paraqitje puçrrave të vogla në lëkurë, me shpërthim të njollave, të kërkojnë ndihmën e mjekut dhe zakonisht infeksioni kalon lehtë pas disa ditësh”, thuhet më tej në përgjigje.

Përveç Kosovës edhe Shqipëria nuk e ka në kalendar vaksinimin kundër lisë së ujit.