Sot Kuvendi i Kosovës ka mbajtur seancë plenare me një pikë të rendit të ditës, ku është bërë shqyrtimi i parë i Projektligjit mbi ndarjet buxhetore për Buxhetin e Kosovës për vitin 2025.

Pas deklarimeve të njëpasnjëshme nga kryeministri, ministra e deputet, fjalim ka pas edhe deputeti i “Aleancës për Ardhmërinë e Kosovës”, Pal Lekaj.

Lekaj sot në seancë ka deklaruar se zyrtarët shtetërorë janë zhytur në luks në kohën kur qytetarët po përballën me inflacion të lartë.

“Nuk mund të injorojmë strukturimet e mëdha që janë bërë për projekte kyçe infrastrukturore. Qytetarët meritojnë rrugë të sigurta dhe shkolla. Janë rritur shpenzimet për pozita administrative, duke krijuar më shumë vende pune për militantët e partisë dhe duke thelluar nepotizmin”.

Lidhur me këtë ka reaguar, zëvendësministri i Infrastrukturës, Hysen Durmishi, i cili e ka quajtur deputetin Lekaj “hajn i dëshmuar”.

Durmishi ka shkruar se kudo që ka prekur dora e Lekajt “përbën krim e korrupsion, përshirë edhe rrugën Dollc-Gjakovë”.

“Pal Leku, ky hajn i dëshmuar tashmë edhe me vendim gjykate del e flet për projekte infrastrukturore. Kudo ku ka prekur dora e tij përbën krim e korrupsion, përfshirë edhe rrugën Dollc – Gjakovë”, ka thënë ai.

Një kundërpërgjigje për zëvendësministrin Hysen Durmishi e ka pasuar edhe deputeti i AAK-së, Pal Lekaj.

Lekaj për “Front Online” duke ju referuar Durmishit, ka deklaruar se personat që përdorin gjuhen e “rrugaçit” nuk e meritojnë asnjë minutë të merren me ta.

Sipas Lekajt, Durmishi është shembulli i kulturës së Qeverisë aktuale.

“Njerëzit që përdorin gjuhën e rrugaçit nuk meritojnë as një minutë të vetme të merremi me ta. Durmishi është shembulli më i mirë i kësaj kulture që qeveria po promovon”, ka thënë Lekaj për “Front Online”.