Një avion i linjës Azerbaijan Airlines, i cili u rrëzua ditën e Krishtlindjes, dyshohet të jetë qëlluar nga një sistem mbrojtës ajror i ushtrisë ruse, sipas një firme britanike të sigurisë ajrore.

Aksidenti ka shkaktuar menjëherë spekulime se avioni mund të jetë qëlluar pasi ndryshoi drejtimin e tij me qindra kilometra dhe u rrëzua me vrima në trupin e avionit, transmeton klankosova.tv.

Siç raporton britanikja The telegraph, blogerët ushtarakë rusë kanë sugjeruar se avioni, i cili u rrëzua pranë qytetit të Aktau në Kazakistan, mund të jetë ngatërruar me një dron ukrainas.

Incidenti, që shkaktoi vdekjen e të paktën 38 personave dhe plagosjen e 29 të tjerëve, ndodhi pas një devijimi të rëndësishëm, i cili mund të jetë shkaktuar nga bllokimi i sinjalit GPS.

Avioni i tipit Embraer 190 bëri një ulje emergjente 3 kilometra larg qytetit Aktau, një qendër nafte dhe gazi në bregun lindor të Detit Kaspik, ditën e mërkurë.

Avioni ishte duke fluturuar nga Baku, kryeqyteti i Azerbajxhanit, drejt Groznit, kryeqyteti i Çeçenisë në Kaukazin e Veriut.