Gjykata Kushtetuese ka pranuar pjesërisht ankimin e ish-zëvendëskryeministrit Arben Ahmetaj, lidhur me sekuestrimin e disa pasurive të tij.

“Kushtetuesja” ka shfuqizuar vendimet e Gjykatës së Posaçme dhe Gjykatës së Lartë, duke i lënë në fuqi disa masa të tjera të marra më herët.

Në vendimin e saj, Gjykata Kushtetuese ka shfuqizuar sekuestrimin e një apartamenti në rrugën “Kreshnik Çollaku”, një llogarie bankare dhe një depozite në një bankë të nivelit të dytë.

Për këto pasuri, çështja është dërguar përsëri për shqyrtim në Apelin e Posaçëm.

Kujtojmë që ish-numri dy i qeverisë Arben Ahmetaj ankimoi në Gjykatën Kushtetuese kontrollin e banesës së bashkëjetueses. Ai kërkoi shfuqizimin e vendimit të Gjykatës së Posaçme, të lëna në fuqi nga Apeli dhe Gjykata e Lartë.

Sipas ankimit, kontrollet janë në papajtueshmëri me ligjin dhe antikushtetuese, pasi nuk ka patur autorizim nga Kuvendi, sepse në njërën nga banesat jetonte edhe vetë

Mbrojtja rëndit katër pika pse e konsideron të paligjshëm kontrollin e banesave. Nga Kushtetuesja Ahmetaj kërkoi shfuqizimin e vendimit të Gjykatës së Lartë dhe dërgimin e çështjes për rigjykim në Apel.

Arben Ahmetaj është nën hetim për një sërë akuzash që lidhen me pasurinë e tij. Deri tani, i janë sekuestruar 4 apartamente, 2 vila dhe një llogari bankare.

Ahmetaj, i cili u largua nga Shqipëria para firmosjes së urdhër-arrestit, është shpallur në kërkim ndërkombëtar që prej 24 korrikut 2023.

Ai akuzohet për “mosdeklarim, deklarim të rremë dhe fshehje të pasurisë”, si dhe për “korrupsion pasiv të funksionarëve të lartë shtetërorë ose të zgjedhurve vendorë” në gjashtë raste, dhe për “pastrimin e produkteve të veprës penale ose veprimtarisë kriminale”./Sinjali/