Sot u zyrtarizua në Luksemburg sistemi “semafori i BE”, i propozuar nga Komisioni Evropian në shtator. Sipas këtij propozimi, qeveritë synojnë që të shmanget mbyllja e kufijve, e cila do të kishte pasoja të tmerrshme për ekonomitë e Eurozonës, por edhe të vendoset tampon i detyrueshëm për të gjithë personat që hyjnë nga zonat e kuqe

Sipas marrëveshjes, Qendra Evropiane për Parandalimin dhe Kontrollin e Sëmundjeve do të publikojë një hartë javore të situatës rajonale në vendet e BE, me një kod ngjyrash bazuar në nivelin e rrezikut: E gjelbër, portokalli dhe e kuqe.

Informacioni do të bëhet i disponueshëm online, ku përdoruesit mund të kërkojnë vende të veçanta për të parë nëse kufijtë janë të hapur dhe cilat kufizime ekzistojnë, si dhe lidhje me informacionin epidemiologjik të vendit.

Ngjyra e semaforit të një rajoni të caktuar do të varet nga numri i rasteve të reja për 100,000 banorë gjatë 14 ditëve të fundit dhe shkalla e testeve pozitive.

Ndërsa pjesë e këtij sistemi do të shtohet edhe ngjyra ‘gri’, për zonat ku ka të dhëna të pamjaftueshme ose ku numri i testeve të kryera për 100,000 banorë konsiderohet shumë i ulët.

Si do funksionojë:

Udhëtarët që vijnë nga një zonë portokalli, e kuqe ose gri mund t’u kërkohet t’i nënshtrohen karantinës pas mbërritjes.

Ata që vijnë nga zona të gjelbërta të përcaktuara me kritere të përbashkëta nuk do të vuajnë asnjë lloj kufizimi në lëvizje dhe udhëtim.

Sistemi i ngjyrave u përcaktua kështu:

Të kuqe: Zonat me rrezik të lartë, që kanë më shumë se 50 raste për 100.000 njerëz me 4% që testohen pozitivë ose më shumë se 150 raste për 100.000 me më pak se 4% të testohen pozitivë.

Portokalli: Zonat me rrezik të mesëm, me më shumë se 25 raste për 100.000 njerëz me 4% që testohen pozitivë ose rreth 25 raste për 100.000 njerëz me më pak se 4% të testohen pozitivë.

E gjelbër: Zonat me rrezik të ulët, me më pak se 25 raste për 100.000 njerëz me më pak se 4% të testohen pozitivë.