Kryeministri në detyrë, Albin Kurti sërish nuk është përgjigjur nëse nesër do të jetë sërish emri i Albulena Haxhiut për kryekuvendare.

Kurti u pyet për këtë çështje derisa mori pjesë në përurimin e një ure në Rogovë të Hasit.

“Shiu është për bereqet”. Kaq ka thënë kryeministri në detyrë, kur është pyetur për dështimin për herë të pestë të konsituimit të Kuvendit të Kosovës.

“Ne ndërtojmë ura, banorët e Rogovës punojnë tokën e shiu është për bereqet”, tha shkurt Kurti para gazetarëve.

Kuvendi i Kosovës që nga 15 prilli është mbledhur pesë herë, derisa në tri tentime nuk ka arritur t’i ketë 61 vota për ta zgjedhur Albulena Haxhiun kryetare të Kuvendit.

Propozimi i Lëvizjes Vetëvendosje vazhdon të mbetet emri i Albulena Haxhiut. Në tri votime, ajo s’ka marrë votat e nevojshme. Nga 61 sa duhen, Haxhiun e kanë votuar vetëm 57 deputetë.

Në Vetëvendosje kanë thënë se emri i saj do të jetë sërish të premten si i propozuar i tyre.

Partitë e tjera, PDK, LDK dhe AAK kanë kërkuar nga Vetëvendosje që të gjejnë një kandidat unifikues për këtë post, ngase siç kanë thënë ata emri i Albulena Hahxiut, për ta është i papranueshëm