Edhe në Lëvizjen Vetëvendosje janë deklaruar lidhur me takimin e sotëm mes ambasadorit të ShBA-së në Kosovë Philip Kosnett dhe liderit të VV-së, Albin Kurtit.
Përmes, një komunikate për media bëhet e ditur se temë e takimit ka qenë formimi sa më I shpejtë I qeverisë dhe parlamentit.
Sipas kësaj komunikate, Kurti u zotuar se shumë shpejtë do të formohet qeveria e re.
Komunikata e plotë:
Ambasadorin e ShBA-së në Kosovë, z. Philip S. Kosnett të shoqëruar nga këshilltarja e tij për çështje politike Amy Carnie, i priti sot në mëngjes në takim Kryetari i Lëvizjes VETËVENDOSJE!, njëherazi kandidati për kryeministër, Albin Kurti, bashkë me anëtaren e kryesisë së Lëvizjes, Arbërie Nagavci, dhe asistenten ekzekutive, Valë Gjonbalaj.
Ambasadori, z. Kosnett uroi kryetarin Kurti për fitoren në këto zgjedhje duke i dëshiruar sukses të mëtejmë. Ai uroi që nga ky proces sa më parë të kemi një qeveri e parlament funksional. Kryetari Kurti e falënderoi për urimin dhe vizitën, dhe ndau bindjen që shumë shpejt do ta kemi qeverinë e re, dhe mundësinë për të bashkëpunuar për projekte konkrete që ndihmojnë shtetndërtimin demokratik, zhvillimin ekonomik të vendit tonë dhe thellimin e marrëdhënieve bilaterale midis dy shteteve tona./Front Online/
