Nesër në Kosovë mbahen zgjedhjet e parakohshme parlamentare.

E gjatë ditës së nesërme, votën në kutitë e votimit do ta hedhin edhe vet kandidatët për kryeministra.

LDK ka bërë të ditur se kandidati i saj për kryeministër, Avdullah Hoti, do të votojë në orën 09:30 në Fakultetin Filologjik.

Ai aty do të jetë i shoqëruar nga bashkëshortja e tij, Servete Hoti.

Për dy kundërkandidatët e tij, Hoxhaj e Kurti nuk dihet akoma.

E kryetari i Aleancës për Ardhmërinë e Kosovës, Ramush Haradinaj, nesër do t’i drejtohet kutive të votimit sikurse një milion e 800 mijë qytetarë të tjerë që kanë të drejtë vote.

Ai në ora 09:30 do të shkojë në shkollën e mesme të mjekësisë “Ali Sokoli” në Prishtinë për të hedhur votën e tij.

Konferencat e rregullta të AAK-së për media lidhur me mbarëvajtjen e procesit zgjedhor janë të planifikuar në këto orare: 10:30, 12:30, 14:30, 16:30, 18:30 dhe 20:30.

Po ashtu Presidenca ka dhënë detaje se ku pritet të votojë ushtruesja e detyrës, Vjosa Osmani.

Siç është bërë e ditur me anë të një komunikate për media, Osmani do të votojë në orën 10:00.

Ajo votën e saj do ta hedh në qendrën e votimit në Fakultetin Teknik në Prishtinë.

Ndryshe, Osmani garon në këto zgjedhje në një listë të përbashkët me Vetëvendosjen.