Kryeprokurori i Gjykatës Ndërkombëtare Penale (International Criminal Court – ICC), Karim Khan, do të përballet me një hetim të jashtëm lidhur me akuzat për keqtrajtimin seksual.
Khan, britanik nga kombësia, ka deklaruar se do të angazhohet në procesin e hetimit, por do të vazhdojë të mbajë postin e tij gjatë kohës që hetimi të jetë në zhvillim, transmeton klankosova.tv.
Ai ka mohuar publikisht të gjitha akuzat.
Ishte Khan, 54 vjeç, ai që njoftoi më herët se Gjykata Ndërkombëtare Penale (ICC), e bazuar në Hagë, kishte lëshuar një urdhër-arresti për presidentin rus Vladimir Putin për krime të supozuara kundër fëmijëve të Ukrainës.
Në lidhje me akuzat për keqtrajtimin seksual kundër tij, prokurori kryesor kishte kërkuar një hetim nga organi mbikëqyrës i gjykatës, por trupi drejtues i ICC-së ka njoftuar tani se do të ndërmarrë një “hetim të jashtëm”.
Deklarata pasoi raportet mediatike për një dokument që përmban akuza kundër Khan, të cilat besohet të përfshijnë prekje seksuale të paautorizuar dhe “abuzim”.
