Italia është një nga shtetet e shumta evropiane që është duke u përballur me një shtim të shpejtë të rasteve të reja me koronavirus. Vetëm një ditë më parë, u raportuan mbi 10 mijë të infektuar dhe 55 persona humbën jetën.

Për situatën aktuale dhe atë që pritet të ndodhë ka folur kryeministri i Italisë, Giuseppe Conte, i cili është shprehur se rikthimi i izolimit duhet të shmanget.

“Nuk them që vala aktuale është më pak e rrezikshme, por ne kemi punuar. Ne duhet ta përballojmë këtë valë me një strategji të re, ndryshe, në të cilën nuk parashikohet më një izolim”, u shpreh Conte.

Kryeministri italian shtoi se BE po financon për të garantuar miliona vaksina. “Për vaksinat është bërë një investim i madh. Disa grupe parashikojnë rezultatet deri në fund të nëntorit ose dhjetorit. Ne mund të kemi 200 ose 300 milionë vaksina shumë shpejt. Ne do të jemi në gjendje të reagojmë ndaj koronavirusit me anë të vaksinave. Gjithashtu, jemi duke u kujdesur të sigurojmë vaksina edhe për vendet më në vështirësi”, tha Conte.