Ministrja e Punëve të Jashtme dhe e Diasporës, Meliza Haradinaj-Stublla, e shoqëruar nga Ambasadori i Kosovës në Gjermani, Beqë Cufaj, sot në hapësirat e Ambasadës së Republikës së Kosovës në Berlin priti në një takim Drejtorin e së Drejtës për Rrugë dhe Marrëveshje Ndërkombëtare në Ministrinë e Transportit dhe Digjitalizimit në Qeverinë e Gjermanisë, Guido Zielke.

Në këtë takim u bisedua procesi i avancimit të bisedimeve rreth njohjes së patent shoferëve mes Kosovës dhe Gjermanisë.Haraidnaj-Stublla me këtë rast theksoi nevojën që ky proces të përmbyllet sa më shpejt ngase siç tha ajo janë me mijëra shqiptarë nga Kosova të cilët janë futur në tregun e punës në Gjermani dhe nuk kanë të drejtë të përkthejnë patent shoferët e tyre.

Kryediplomajta e siguroi Zielke se Qeveria e Kosovës është e vendosur që të zbatojë rekomandimet e Qeverisë së Gjermanisë në mënyrë që kjo marrëveshje të përmbyllet sa më shpejt.Duke u shprehur optimist se ky proces do të përmbyllet së shpejti, Zielke tha se pas vizitës që kishte realizuar delegacionit gjerman në muajin shkurt, priste që njohja reciproke e patent-shoferëve të mbyllej qysh këtë vit, porse rrethanat pandemike kanë bërë të pamundur takimin e ekspertëve të të dyja vendeve.