Albert Krasniqi i demokracia plus ka komentuar debatin Qeveri – Presidencë për tarifën e vendosur nga Donald Trump. Ministri Murati u përfshi në një përplasje me Presidenten Osmani, në lidhje me ri-shqyrtimin e tarifave për ShBA-të nga Kosova. Fokusi i këtij debati ishte një email i dërguar para apo pas orarit të punës.
Krasniqi ka shkruar se kjo tregon se përse nuk po merremi seriozisht në arenën ndërkombëtare.
Tarifat e SHBA-së kanë shkaktuar tensione dhe luftë tregtare në mbarë botën, duke shqetësuar liderët e vendeve të prekura, të cilët përballen me pasojat ekonomike dhe diplomatike. Ndërsa shumë qeveri po kërkojnë zgjidhje dhe strategji për t’u përshtatur me këto masa, tek ne duket se shqetësimi kryesor është ruajtja e rehatisë pas orarit të punës.
Debati mes Presidentes dhe Ministrit të Financave, i karakterizuar nga mungesa e koordinimit dhe komunikimit institucional, tregon qartë pse shteti ynë nuk merret më seriozisht në arenën ndërkombëtare. Në vend të një politike të jashtme të qartë dhe të konsoliduar, shohim një qasje të çakorduar, të diktuar nga protagonizmi dhe nevoja për vëmendje.
