Përfaqësuesja e Kosovës U19 ka pësuar humbje në ndeshjen e dytë miqësore kundër Kombëtares së Shqipërisë së kësaj grupmoshe.

Ndeshja e zhvilluar paraditen e sotme në “Elbasan Arena” u mbyll me rezultat 3:0, përcjell FrontOnline.Për dallim nga miqësorja e para dy ditëve, të cilën djelmoshat e drejtuar nga Ramiz Krasniqi e fituan 1:0, kësaj radhe ishin futbollistët e Kombëtares së Shqipërisë, të cilët u paraqitën më mirë dhe arritën që në pjesën e parë të krijojnë epërsi prej dy golash.

Më pas, “Dardanët” e rinj u përpoqën që në pjesën e dytë të kthehen në rezultat, por një gjë të tillë nuk e arritën.

Madje, si pasojë e koncentrimit në fazën e sulmit ata në minutën e 77-të pësuan edhe golin e tretë.

Këto dy miqësore i kanë shërbyer përzgjedhësit Ramiz Krasniqi për ta parë formën e ekipit dhe për ta përgatitur atë sa më mirë për ndeshjet kualifikuese që zhvillohen në vjeshtë./FrontOnline/