Kryetari i Lëvizjes Vetëvendosje, njëherësh kryeministri në detyrë i Kosovës, Albin Kurti, i ka nisur takimet dhe konsultimet për formimin e Qeverisë, me komunitetet joshumicë që janë pjesë e Kuvendit të Kosovës.

Sot, ai ka takuar edhe kryetarin e Partisë Demokratike Turke të Kosovës, Fikrim Damka, i cili aktualisht është edhe ministër në detyrë i Zhvillimit Rajonal.

Lidhur me takimin, detaje ka dhënë Zyra e Kryeministrit.

“Ky takim u mbajt në kuadër të konsultimeve me partitë politike të komuniteteve joshumicë për formimin e qeverisë së re pas certifikimit të rezultateve nga Komisioni Qendror i Zgjedhjeve. Përgjatë ditës kryeministri do të zhvillojë takime edhe me drejtues dhe përfaqësues tjerë të partive të komuniteteve joshumicë që kanë fituar mandat të përfaqësimit në kuvend”, thuhet në njoftimin e Qeverisë transmeton Klankosova.tv

“Bashkë diskutuan për hapat përpara për formimin e institucioneve të legjislaturës së 9-të të dalë nga zgjedhjet e rregullta parlamentare të 9 shkurtit. Kryeministri Kurti falënderoi z. Damka për punën si ministër i kabinetit në këtë mandat të plotë të qeverisë dhe për bashkëpunimin e afërt si në qeveri ashtu edhe në kuvend. Të dyja palët shprehën vullnetin dhe gatishmërinë që ky bashkëpunim i frytshëm të vazhdojë edhe në legjislaturën në vijim”, thuhet tutje në njoftim