Nënkryetari i Lëvizjes Vetëvendosjes, Glauk Konjufca, duke folur për historikun e krijimit të Gjykatës Speciale, tha se se nuk ka qenë rastësi që libri i Carla Del Pontes pak pas shpalljes së pavarësisë së Kosovës më 17 shkurt 2008.

Konjufca tha se Del Ponte në librin e saj ankohej seriozisht dhe pretendonte se faktorët e fuqishëm ndërkombëtarë e kanë penguar ta kryente misionin e saj.

“Ajo thoshte se ka hasur në pengesa përmes ndërhyrjeve të niveleve të larta. Ajo thotë se brenda UÇK-së ka ekzistuar një ndërmarrje kriminale. Ajo përgjegjës i bënë krerët e UÇK-së dhe dëshironte të kriminalizonte UÇK-në”, ka thënë Konjufca, për RTK.

Ai më pas tha se pas këtij libri është mobilizuar delegacioni rus në Këshillin e Evropës.

“Ishte iniciativë e koordinuar ndërmjet Rusisë dhe Serbisë, pasi që mocioni i dorëzuar nga Kosaçev në titull e kishte trafikimin e organeve. Këto nuk mund të jenë të rastësi, pasi janë goditje pas shpalljes së pavarësisë. Pas dy vjete këtë temë e merr Dick Marty, pra në vitin 2010”, ka thënë tutje ai.

Konjufca shtoi se dihet lidhjet e ish senatorit Marty me Serbinë dhe Rusinë, duke përmendur deklaratën e ish ambasadorit serb në Zvicër.