Në kohë fushate, Komuna e Gjilanit ka vendosur të merret me shpërndarjen e ndihmave për familjet në asistencë sociale, shkruan Front Online.

Kjo shpërndarje e ndihmave është organizuar përmes drejtorisë së Shëndetësisë dhe Mirëqenies Sociale, ku janë shpërndarë 500 pako ushqimore.

Anipse ndihmat vijnë në kohën kur ka filluar fushata zgjedhore në vend, sipas komunës së Gjilanit, kjo nuk është arsyeja e shpërndarjeve të pakove për qytetarët, por për t’iu dalë në ndihmë finanicare.

Drejtori i Qendrës për Punë Sociale në Gjilan, Mursel Zymberi thotë Komuna edhe vitin e kaluar iu ka dalë në ndihmë qytetarëve, jo vetëm këtë vit.

Sipas tij, kategoritë më të prekura në aspektin financiar janë ndihmuar.

“Vitin e kaluar rreth 900 pako janë shpërndarë kësaj radhe 500 familje janë ndihmuar nga kategoria sociale kryesisht gjendjes më të rëndë dhe kategorisë së dalur nga lufta edhe pensioner me gjendje më të rëndë sociale me mjete vetanake të komunës. Do të ketë edhe ndihma të tjera, por nuk e dimë kur”, u shpreh Zymberi.

Drejtori i Shëndetësisë në këtë komunë, Hekuran Rapuca, thotë se shpërndarja e pakove për qytetarët gjilanas s’ka lidhje me fushatë.

Rapuca vlerëson se ndihma nga komuna ka ardhur për familjet në nevojë.

“500 pako janë shpërndarë duke ditur që muajt e fillimit të vitit janë financiarisht më të rënda sidomos për familjet që janë në vështirësi financiare e kemi parë që është ndihmë e mirë për ta. Jo nuk lidhet me fushatë se edhe vitin e kaluar dhe më shumë pako kemi shpërndarë se këtë vit”, deklaroi ai për “Front Online”.