I akuzuari për vjedhje të shërbimeve, Imer Musaj, e ka pranuar fajësinë, në seancën e shqyrtimit fillestar që është mbajtur të hënën, në Gjykatën Themelore në Pejë, dega në Klinë.

Pas leximit të aktakuzës nga prokurori i çështjes, Muharrem Bajraktari, i akuzuari Musaj, fillimisht ka deklaruar se pjesërisht e ndien vetën fajtor, pasi që sipas tij, kompania KEDS, i kishte hequr njehsorin elektrik, me arsyetimin se nuk është duke funksionuar në mënyrë të rregullt, mirëpo nuk e kishte zëvendësuar të njëjtin prej dy javësh.

“Unë pjesërisht e ndiej vetën fajtor. KEDS-i e ka marrë orën time, për shkak se sipas tyre ora ime nuk po numëron mirë. KEDS-i, nuk e ka zëvendësu me një orë tjetër dhe nuk kanë ardhur që dy javë. Megjithatë unë po e pranoj fajësinë për këtë vepër”, ka thënë i akuzuari Musaj.

Pranimin e fajësisë nga ana e të akuzuarit Musaj, nuk e ka kundërshtuar prokurori Bajraktari, si dhe më pas me aktvendim e ka aprovuar edhe gjykatësi i rastit, Jashar Gashi.

Gjykatësi Gashi, ka thënë se aktgjykimi do të shpallet më 5 nëntor 2019, në orën 15:00.

Sipas aktakuzës së ngritur më 6 gusht 2019, nga Prokuroria Themelore në Pejë, Imer Musaj, akuzohet për shkak se më parë e gjerë më 4 shtator 2017 në shtëpinë e tij, në cilësinë e shfrytëzuesit të energjisë elektrike, në kundërshtim me nenin 61 të Ligjit për Energjinë Elektrike, me qëllim që vetës t’i sjellë pasuri në mënyrë të kundërligjshme, pa autorizim të furnizuesit të autorizuar, ka përdorë energjinë elektrike.

Në aktakuzë thuhet se gjatë kontrollit të bërë nga ana e komisionit të autorizuar të KEDS-it, të njëjtit kanë hasur që në atë objekt njehsori elektrik është i pa bllombuar, ku L1 rezulton me hyrje-dalje të bashkuar, me çka në mënyrë të paautorizuar ka shpenzuar energjinë elektrike të paregjistruar, duke i shkaktuat KEDS-it dëm në vlerë prej 436,43 euro.

Për shkak të këtyre veprimeve, ai akuzohet se ka kryer vepër penale “Vjedhja e shërbimeve”, nga neni 314 paragrafi 1, lidhur me paragrafin 6, të Kodit Penal të Republikës së Kosovës. /Front Online/