Dhomat e Specializuara të Kosovës në Hagë, mëngjesin e sotëm kanë arrestuar ish-kryetarin e Malishevës, Isni Kilaj, ish-kreun e AKI-së, Bashkim Smakaj dhe ish-luftëtarin e UÇK-së, Fadil Fazliu.
Sot është bastisur edhe shtëpia e ish-ministrit të Drejtësisë, Hajredin Kuçit.
Kilaj ishte arrestuar edhe nëntorin e kaluar nga kjo gjykatë, por ai ishte lirua më 15 maj të këtij viti nwn kushte të rrepta, në bazë të vendimit të gjykatësit të vetëm të Dhomave të Specializuara të Kosovës (DHSK) të datës 3 maj 2024.
Ndërsa gjatë vitit të kaluar me urdhër të Gjykatës Speciale ishin kryer bastisje edhe në shtëpinë e ish-shefit të AKI-së, Bashkim Smakaj.
Siç ishte raportuar atë kohë, aksioni lidhej me dyshimet për vepra penale kundër administrimit të drejtësisë, përkatësisht për frikësim të dëshmitarëve, hakmarrje dhe shkelje të fshehtësisë së procedurës.
Po ashtu sipas raportimeve ishin sekuestruar prova të ndryshme, përfshirë dokumente dhe telefona.
Faton Klinaku, ushtrues i detyrës së kryetarit të Organizatës së Veteranëve të Luftës së Ushtrisë Çlirimtare të Kosovës (OVL UÇK), ka reaguar duke e quajtur këtë si një “spektakël” që ka vazhduar për një kohë të gjatë.
‘’Arrestimet dhe bastisjet që po ndodhin sot janë spektakle të vazhdueshme që këta i kanë bërë vazhdimisht derisa atje në Hagë shokët tanë po përballen me shpifjet që i kanë bërë njerëzit ‘’, tha Klinaku për FrontOnline.
Ai ka akuzuar Zyrën e Prokurorit të Specializuar se po përpiqet të krijojë prova duke analizuar telefonat e të arrestuarve.
‘’Zyra e Prokurorit Special mundohet që diçka të nxjerrë nga këto bastisje nga telefonat e tyre se këta kanë komunikuar me njerëz dhe mundohet të krijojnë fakte ndonëse nuk kanë fakte’’, tha Klinaku.
Klinaku ka thënë se krerët e UCK-së po mbahen në paraburgim pa fakte të mjaftueshme dhe se Prokuroria po përdor shantazhin ndaj dëshmitarëve për të detyruar ata të japin dëshmitë që duan.
‘’Po ashtu pengimin e drejtësisë janë duke e bërë dhe e kanë bërë vazhdimisht zyra e prokurorit te specializuar sepse i kanë kërcënuar dhe shantazhuar dëshmitarët vazhdimisht që ne kemi fakte i kanë kërcënuar e shantazhuar për t’i detyruar ata të flasin siç duan ata’’, përfundoi Klinaku.
