Ministrja e Drejtësisë, Albulena Haxhiu ka deklaruar se duhet të të krijohet një mekanizëm mbikëqyrës ndërkombëtarë apo vendor, për Gjykatën Speciale në Hagë.

Për këtë temë në një përgjigje për TV Arbëria, ka folur Faton Klinaku, kryetari i OVL-së UÇK-së, ai ka thënë kanë kërkuar vazhdimisht krijimin e një mekanizmi mbikëqyrës për Dhomat e Specializuara, që lidhet me shkeljet që sipas Klinakut po iu bëhen krerëve të UÇK-së në Hagë.

Ai tutje ka thënë se për shkeljet në Hagë është në dijeni edhe Ministrja e Drejtësisë, Albulena Haxhiu.

“Ne si OVL UÇK kemi kërkuar vazhdimisht nga institucionet e Kosovës që ta krijojnë një mekanizëm mbikqyrës për Dhomat e Specializuara, sepse i kemi parë shkeljet e vazhdueshme që po u bëhen bashkëluftëtarëve të paraburgosur në Hagë, por asnjëherë nuk është bërë asgjë në këtë drejtim. Se çfarë shkeljesh u janë bërë e iu bëhen atyre, është shumë mirë e njoftuar Ministrja e Drejtësisë znj. Albulena Haxhiu, sepse edhe vet ka qenë në vizitë në Dhomat e Specializuara në Hagë, por edhe ka pasur disa herë takime me kryetaren e DHSK-së znj. Ekaterina Trendafilova”, ka thënë Faton Klinaku.

Klinaku thotë se për këto shkeljet ka folur edhe Nasim Haradinaj, ish i burgosuri nga Gjykata Speciale, dhe sipas tij pas këtyre deklaratave reagoi edhe ministrja Haxhiu.

“Fakti që doli edhe ish-nënkryetari Nasim Haradinaj në media, dhe tregoj për shkeljet e rënda që u janë bërë e iu bëhen të paraburgosurve në Hagë, e bëri që të reagoj Ministrja Haxhiu. Ajo paska thënë tash se vendi ynë duhet ta krijojë një mekanizëm mbikqyrës ndërkombëtar apo vendor për Dhomat e Specializuara, veçanërisht në aspektin e të drejtave të personave të akuzuar, pra ka thënë duhet e që është dëshirore, sepse nuk e ka thënë se vendi ynë do ta krijojë atë mekanizëm mbikqyrës”, ka thënë Klinaku.

Kryetari i OVL UÇK-së, shton se Ministria e Drejtësisë, duhet të marrë hapa konkret në këtë drejtim.

“Ministrja Haxhiu, duhet të marrë hapa më konkret për mbrojtjen e të akuzuarve, duke përfshirë rritjen e financimeve për avokatët mbrojtës. Ndërsa, sa i përket transparencës, qasja në dokumentet zyrtare garantohet nga legjislacioni i Kosovës, prandaj duhet të sigurohet që kjo të realizohet pa e dëmtuar mbrojtjen ligjore të të akuzuarve”, ka thënë Klinaku.