I pëlqen dikujt apo jo, Kina vërtet prodhon disa makina të shkëlqyera, SUV luksoz, hibrid dhe automjete elektrike, dhe mund të tregtojë një makinë fluturuese para kujtdo tjetër.

Kompania koreano-jugore Hyundai vlerëson se makinat fluturuese do të bëhen realitet para fundit të dekadës, por marka kineze Xpeng po përpiqet ta bëjë këtë edhe më herët.

Xpeng ka prezantuar një makinë fluturuese që do të tregtohet nga filiali i saj HT Aero, i cili fokusohet ekskluzivisht në Urban Air Mobility (UAM), dhe deri më tani ka kryer më shumë se 15,000 fluturime testuese me prototipe të ndryshme të dronëve dhe makinave fluturuese. Prototipi i fundit ende nuk ka një emër, por Xpeng pret që prodhimi të fillojë që në vitin 2024. Automjeti elektrik ka përmasa të ngjashme me një makinë standarde, por ka helikë të palosshme që mund të “fshihen” në trup kur makina lëviz në tokë.

Por koncepti ka edhe të metat e veta. Para së gjithash, helikat duken të rënda, dhe kjo nuk do të ndikojë pozitivisht në diapazonin. Edhe nëse janë bërë nga një material i lehtë si karboni, problemi në këtë rast bëhet kostoja.

Tesla gjithashtu planifikon të ketë një makinë fluturuese dhe drejtori i kompanisë Elon Musk njoftoi në vitin 2019 se Roadset do të jetë në gjendje të fluturojë. Që atëherë, nuk ka pasur asnjë provë për të vërtetuar pretendimet e tij, por një gjë është e sigurt, cilado kompani që të vijë e para, patjetër do të tërheqë shumë vëmendje.

Mbetet shpresa se ligjet dhe protokollet e sigurisë do të përparojnë po aq shpejt sa teknologjia./FrontOnline/