Shefja e grupit parlamentar të LDK-së, Jehona Lushaku-Sadriu pyetur nga gazetarët nëse presidentja Vjosa Osmani do të kthehej të garonte me LDK-në nëse vendi veç shkon në zgjedhje të reja parlamentare për shkak të dështimit për ta zgjedhur një president, deklaroi se diçka e tillë “i takon së ardhmes”.

“Krejt këto i takojnë të ardhmes. Mendoj që tani në këtë moment është e rëndësishme që të kemi prezantim zyrtar të ndonjë kandidati që do t’i japë epilog kësaj drame të panevojshme në këtë moment”, tha deputetja e LDK-së.

Lushaku tha se LDK-ja ishte e gatshme për dialog dhe diskutime dhe për “një emër konsensual” për President.

“Ne numrat nuk i kemi të vetëm që ta prezantojmë asnjë emër dhe ta bëjmë zgjedhjen e Presidentit”, tha ajo.

Ndërkohë që Osmani kërkon edhe një mandat në karrigen e shefes së shtetit, në LVV kanë thënë se s’kanë mbledhur nënshkrime e se s’kanë kandidat për President, sa herë që janë pyetur për të.

E pyetur nëse do ketë një takim të radhës mes Kurtit dhe Abdixhiku, Lushaku-Sadriu tha se s’ka parë diçka të tillë.