Prokuroria Themelore në Pejë ka paraqitur kërkesë për caktimin e masës së paraburgimit ndaj Flori Beqirajt, i dyshuar për sulm seksual ndaj Mrika Nikqit.
Lajmin për Front Online e ka bërë të ditur Shkodran Nikçi, zëdhënës i Prokurorisë së Pejës.
Ai, ka thënë se aktualisht është duke u mbajtur seanca dëgjimore.
Rasti ka ndodhur më 27 shtator në qendër të qytetit të Pejës, ndërsa kërkesa për paraburgim në gjykatën kompetente është bërë këtë të shtunë.
“Me datë 27 shtator ka ndodhur rastit i veprës penale të “Sulmit Seksual” dhe për këtë çështje penale kanë qenë të angazhuar dy prokurorë të shtetit dhe njësitet relevante policore. Pas punës intensive është bërë e mundshme identifikimi i personit të dyshuar dhe me urdhër të Prokurorit të Shtetit i dyshuari është arrestuar dhe ndaluar fillimisht për 48 orë”, ka thënë ai.
“Gjatë ditës së sotme, Prokuroria Themelore në Pejë ka bërë kërkesë për caktimin e masës së paraburgimit ndaj të pandehurit në gjykatën kompetente, ku gjatë mbajtjes së kësaj seance Prokurori i Shtetit do shpalosë arsye që gjykata t’ia caktojë masën e paraburgimit në kohëzgjatje prej 30 ditësh”, ka shtuar Nikqi.
Alpinistja Mrika Nikqi ka publikuar të premten mbrëma një video ku shihet duke u sulmuar nga një person në një rrugicë në qytetin e Pejës./Front Online