Një person është arrestuar mbrëmë në Gjilan pasi i njëjti fillimisht kishte ikur nga vendi i ngjarjes duke mos u ndalur në pikën e kontrollit të policisë.

I njëjti gjatë ikjes ka goditur disa herë veturën e policisë që ishte në ndjekje të tij. Për pasojë, lëndime trupore kanë pësuar katër policët që ishin në veturë, duke marrë edhe trajtim mjekësor.

Policia ka arritur ta kapë të dyshuarin dhe i njëjti është dërguar në mbajtje.

“Rruga e Kumanovës, Gjilan / 29.01.2025 – 20:44. Është arrestuar i dyshuari mashkull kosovar për shkak se i njëjti kishte ikur nga vendi i ngjarjes duke mos u ndalur në pikën e kontrollit të policisë. I dyshuari gjatë ikjes disa herë ka goditur veturën zyrtare të policisë e cila ishte në ndjekje të tij, me ç’rast lëndime trupore kanë pësuar katër zyrtarë policorë që ndodheshin në veturë. Lidhur me rastin personi i dyshuar është ndaluar nga njësia policore dhe i njëjti është futur nën kontrollë. Zyrtarët policorë dhe dy personat që ishin në veturë kanë pranuar trajtim mjekësor, ndërsa me vendim të prokurorit i dyshuari është dërguar në mbajtje”, thuhet në raportin 24 orësh të Policisë së Kosovës.