Gjatë vizitës së tij në Kili, kancelari gjerman Olaf Scholz kundërshtoi edhe një herë dërgimin e avionëve luftarakë në Ukrainë dhe shprehu dëshirën për t’i dhënë fund debatit. “Është e çuditshme që ky diskutim po zhvillohet fare. Ne duhet të pyesim veten nëse bëhet fjalë për motive politike të brendshme apo për të ndihmuar Ukrainën,” tha Scholz.
Gjatë vizitës së tij në Kili, kancelari gjerman shpjegoi se menjëherë pas fillimit të sulmit rus ndaj Ukrainës, ai përjashtoi mundësinë e dërgimit të avionëve luftarakë në një bisedë me presidentin amerikan Joe Biden. “Në atë kohë, konsideratat e paarsyeshme si dërgimi i trupave u refuzuan. Dhe mendoj se gjithçka është thënë tashmë për këtë temë, edhe për sa më përket mua,” tha Scholz.
“Me çdo kusht është e nevojshme të parandalohet përfshirja e anëtarëve të aleancës së NATO-s në luftën me Rusinë”.
Saskia Esken, kryetarja e Partisë Socialdemokrate të Gjermanisë (SPD), së cilës i përket edhe Olaf Scholz, në një intervistë këto ditë nuk ka hedhur poshtë kategorikisht mundësinë që Gjermania, pas vendimit për dorëzimin e tankeve Leopard 2, të dorëzojë edhe avion luftarak për në Ukrainë.
Scholz, në një intervistë para nisjes për në Amerikën Latine, vlerësoi se aktualisht ka një “garë” në diskutimin se cilat armë duhet t’i dorëzohen Ukrainës. Kyiv zyrtar, pas vendimit të javës së kaluar të Gjermanisë për t’i dorëzuar Ukrainës tanket Leopard 2, po kërkon nga vendet perëndimore armë të tjera, përfshirë edhe avionë luftarakë.
Scholz ka theksuar vazhdimisht se “me çdo kusht” është e nevojshme të parandalohet përfshirja e anëtarëve të NATO-s në një luftë me Rusinë./FrontOnline/