Kandidati i PDK-së për kryeministër ka vazhduar mbajtjen e punëtorive me qytetarë.

Këtë herë ai ishte në Ferizaj, ku tha se mori “ide të mira” për programin e tij qeverisës.

“Ferizaj ishte qyteti i radhës, ku e mbajta punëtorinë me qytetarë dhe mora ide të mira për programin tim. U jam mirënjohës qytetarëve të shumtë anekënd Kosovës, që çdo ditë po angazhohen dhe kontribuojnë me idetë e tyre. Po i bashkojmë qëllimet tona për ta bërë Kosovën më të mirë”, ka shkruar Hamza në profilin e tij në Facebook, duke publikuar një video.

Hamza i ka ftuar qytetarët që me idetë e tyre të bëhen pjesë e programit të tij, i cili, siç thotë ai, ka në qendër adresimin e kërkesave të qytetarëve të Kosovës.

Në këtë video, qytetarët e Ferizajt dëgjohen duke kërkuar nga Hamza rritje të pagave në sektorin publik, përmes rritjes së koeficientit dhe mbështetje të kontratës kolektive.

Ata, po ashtu, kanë numëruar edhe prioritete të tjera që programi i Hamzës duhet t’i ketë, duke sugjeruar edhe digjitalizimin e shëndetësisë në Kosovë.

“Shumë ma mirë kish qenë që kjo TVSH me u pagu kur unë e shes mallin, jo kur unë e blej mallin”, ka thënë një nga të pranishmit e punëtorisë në Ferizaj.

Në fund, Hamza ka theksuar se “një pjesë e madhe e kësaj çka kemi diskutu ka me qenë pjesë e atij programi”.