Justin Bieber po lufton me një sëmundje të rrallë që shkakton paralizë të fytyrës, e cila e ka detyruar atë të anulojë koncerte të shumta.

Këngëtari i “One Time”, 28 vjeç, njoftoi të premten se vuan nga sindroma “Ramsay Hunt”, e cila ndodh kur virusi i herpesit synon një nerv të fytyrës pranë njërit vesh dhe bllokon lëvizjen në gjysmën e fytyrës te individi.

“Siç mund ta shihni, ky sy nuk po pulson. Unë nuk mund të buzëqesh në këtë anë të fytyrës sime. Kjo vrimë e hundës nuk mund të lëvizë”, tha Bieber në një video në Instagram në të cilën ai demonstroi mungesën e lëvizjes në anën e djathtë të fytyrës së tij.

“Kam një paralizë të plotë në njërën anë të fytyrës sime”, deklaroi ai.

Bieber kishte anuluar disa koncerte në vendin e tij në Kanada ditët e fundit, duke i lënë fansat të zhgënjyer.

“Për ata që janë të frustruar nga anulimet e mia të shfaqjeve të ardhshme, unë thjesht nuk jam në gjendje fizikisht, t’i bëj ato”, tha ai.

Bieber tha se ai po bënte ushtrime për të rifituar lëvizjet në anën e djathtë të fytyrës. Sindroma “Ramsay Hunt” zgjat mesatarisht rreth tre javë.