“Konstatojë që me 67 vota për, 30 vota kundër dhe asnjë abstenim zgjedhet Qeveria e Republikës së Kosovës me kryeminstër Albin Kurti”.

Janë bërë fiks 3 muaj që nga ky fjalim i kryeparlamentarit, Glauk Konjufca.

Për 90 ditë qeverisje, Albin Kurti dhe kabineti i tij, kanë mbajtur plot 10 mbledhje qeveritare.

Vendime s`është që s`u morën, por jo edhe ai për reciprocitet me Serbinë, masë kjo që Kurti në fushatë zotohej se do ta aktivizonte tepër shpejt.

“Është çështje ditësh, ose javësh, kurrsesi muajsh”, kishte deklaruar Kurti.

Por, si pushtetar po del se i duhet edhe pak kohë.

“Për ta zbatuar reciprocitetin për të cilin ne jemi zotuar kemi nevojë që t’iu bëjmë ballë suksseshëm edhe barrierave sporadike edhe atyre sistemike. Kjo nënkupton që neve na duhet kohë për t’u përgatitur që ta zbatojmë të plotë reciprocitetin”, u shpreh Kurti.

Brenda tre muajve, Kurti doli vetëm dy herë në konferencë për medie derisa gjatë kohës sa ishte në opozitë ishte shumë i zëshëm me pushtetin e atëhershëm për mostransparencë ndaj qytetarëve.

Në fushatë, Kurti zotohej se do t`i jepte fund edhe nepotizmit.

“Kushërinjtë janë për dasma, për shpija”, pati vlerësuar Kurti në fushatë.

E kundërta u dëshmua në qeverisje.

Punësimi i nipit të Besnik Bislimit dhe axhës së Glauk Konjufcës, janë vetëm dy prej rehatimeve familjare që u bënë brenda kësaj periudhe.

Sidoqoftë, Kurti, ka një arsyetim.

“Ne kemi bërë emërime politike, jo punësime familjare”, tha i pari i qeverisë në Kuvend.

Të drejtë, shefit kosovar të ekzekutivit, nuk po i japin nga shoqëria civile.

“Z.Kurti përgjatë kësaj kohe nuk ka arrit të ndërtojë një ekip që do ta përfaqësonte Kosovën në bisedimet me Serbinë. Kurti ka premtu se nuk do të shkojë në bisedime pa kërkuar falje Serbia, ose do ta vendosë reciprocitetin, gjë që nuk ka ndodhë”, u shpreh politologu Fidan Ukaj për “Front Online”.

Megjithatë, politologu Ukaj, e sheh si pozitive në këtë periudhë ftesën për bashkëpunim rreth dialogut që Kurti ua bëri partive në pushtet dhe propozimet e tij të fundit në Bruksel.

“Këto dy tema kanë qenë tema pozitive, që mund të merren si pozitive ne qeverisjen 100 ditëshe të Kurti”, deklaroi Ukaj.

I kënaqur me punën e Qeverisë Kurti s`është as analisti tjetër politik, Nexhmedin Spahiu.

“Një aktivitet ‘avashllak’ dhe jo energjik i Qeverisë Kurti me gafe të njëpasnjëshme të Ministrisë të Jashtme. Ka qenë e kundërta e asaj që kam pritur. Kam pritur një aktivitet energjik të Qeverisë”, potencoi Spahiu në një prononcim për “Front Online”.

Mbetet të shihet nëse Kurti do ta mbajë edhe zotimin tjetër të tij për të vaksinuar rreth 60 % të popullatës me vaksinën anti-Covid deri ne fund të këtij viti.

Deri tash janë vaksinuar veç 141 mijë qytetarë.