Jakup Krasniqit i është lexuar aktakuza me të cilën ai ngarkohet nga Dhomat e Specializuara. Gjykatësi i procedurës paraprake ia ka shpjeguar rregullat dhe po ashtu e pyeti Krasniqin nëse e ka pranuar aktakuzën në gjuhën shqipe, të cilën e flet.

Krasniqi është përgjigjur se një pjesë të aktakuzës e ka pranuar më 4 nëntor e pastaj në Hagë i është dorëzuar një aktakuzë, për të cilën thotë se ka qenë variant i korrigjuar dhe se e ka kuptuar mirë dhe lexuar mirë.

“Po aktakuzën e kam marrë, edhe një pjesë të saj me 4 nëntor, 2020, por edhe pasi kam ardhë në Hagë e kam marrë një variantë të korrigjuar të aktakuzën, është në gjuhën shqipe e kam kuptuar dhe lexuar mirë”, tha ai, raporton Front Online.

Më 4 nëntor, hetuesit e Speciales, në bashkëpunim me policinë e EULEX-it kanë bastisur pronat e ish-kryetarit të Kuvendit, në Prishtinë dhje fshatin e tij të lindjes, Negroc të Drenasit.

Po atë ditë, Krasniqi është transferuar në objektin e paraburgimit në Hagë.

Jakup Krasniqi është i arrestuari i katërt nga Gjykata Speciale.

Një ditë pas transferimit të tij në Hagë, për në Speciale janë nisur edhe ish-presidenti Hashim Thaçi dhe ish-kreu i Partisë Demokratike të Kosovës, Kadri Veseli./Front Online/