Grupi militant palestinez, Hamasi dhe Izraeli, fajësuan njëri-tjetrin të mërkurën për dështimin e tyre për të përfunduar një marrëveshje armëpushimi, pavarësisht progresit të raportuar nga të dyja palët në ditët e kaluara.

Hamasi tha se Izraeli kishte vendosur kushte të mëtejshme.

“Okupimi ka vendosur kushte të reja në lidhje me tërheqjen, armëpushimin, të burgosurit dhe kthimin e të zhvendosurve, gjë që ka vonuar arritjen e marrëveshjes që ishte në dispozicion”, tha Hamasi.

Ky grup shtoi se po tregonin fleksibilitet dhe se bisedimet, të ndërmjetësuara nga Katari dhe Egjipti, ishin serioze.

Netanyahu u kundërpërgjigj në një deklaratë: “Organizata terroriste Hamas vazhdon të gënjejë, po refuzon mirëkuptimet që tashmë janë arritur dhe po vazhdon të krijojë vështirësi në negociata.”

Megjithatë, Izraeli do të vazhdojë përpjekjet e pandërprera për të kthyer pengjet, shtoi ai.

Negociatorët izraelitë u kthyen në Izrael nga Katari të martën në mbrëmje për konsultime rreth një marrëveshjeje pengjesh pas një jave të rëndësishme bisedimesh, tha të martën zyra e Netanyahut.

Ndërmjetësuesit amerikanë dhe arabë, Katari dhe Egjipti, kanë shtuar përpjekjet për të përfunduar një marrëveshje me faza në dy javët e fundit. Një nga sfidat ka qenë marrëveshjet për vendosjen e trupave izraelite, shkruan Reuters, transmeton Klankosova.tv.