Dukuritë negative apo thënë më mirë manipulimet eventuale të ndeshjeve të futbollit në Kosovë ka qenë tema kryesore e diskutimeve në vendin tonë kohëve të fundit.

Xhiro pas xhiro, tifozët e futbollit kosovar “shpërthejnë” në akuza ndaj klubeve për dyshime të mundshme për manipulime, shkruan FrontOnline.

Përkundër gjithë kësaj, organet kompetente nuk është se e kanë bërë ndonjë “hap” në këtë aspekt, derisa Federata e Futbollit e Kosovës po dënon klubet që po bëjnë akuza të ndryshme – rast konkret Ballkani i Suharekës.

Në lidhje me atë nëse ka dhe ka pasur më herët manipulime të ndeshjeve në futbollin e Kosovës, FrontOnline ka kontaktuar ish-futbollistin më të mirë në Kosovë, Blerand Kurtishajn.

Ish-anëtari i Trepçës ’89 e pranon se dukuri të tilla ekzistojnë në futboll.

“Do të kisha dashur që kurrë të mos ndodhnin gjëra të tilla, por ka këso dukuri në futboll”, ka thënë fillimisht Kurtishaj, duke vazhduar:

“Sa kam qenë unë pjesë e Superligës, në atë kohë edhe nuk kemi qenë të pranuar në UEFA, ndoshta ka pasur mundësi të kishte dukuri të tilla më shpesh”.

Ai thotë se nuk e di ndonjë ndeshje ku ka qenë e kurdisur dhe ai ka luajtur në të, por që thotë se mund të ketë ndodhur pa dijeninë e tij.

“Si çdo futbollist që hynë për ta fituar ndeshjen, ashtu edhe unë gjithmonë kam hyrë. Sa kam unë dijeni, nuk ka pasur, mirëpo mund të ketë ndodhur që kam marrë pjesë në këso dukuri pa e ditur fare”, theksoi 27-vjeçari.

Kurtishaj që sot aktivizohet te Rain/Lech në Ligën e Katërt të Gjermanisë, thotë se manipulimet e ndeshjeve e dëmtojnë futbollin e Kosovës.

“Këto dukuri e dëmtojnë shumë futbollin tonë, i cili për momentin para arenës ndërkombëtare është në një lloj testi që duhet kaluar pasi që jemi shtet i ri dhe duhet të tregojmë shembuj të mirë botërish”, tha ai.

Se si duhen parandaluar këto dukuri, e tregon vetë Kurtishaj:

“Mendoj se me këtë punë duhet të merret FFK-ja, ta krijojë ndonjë grup kundër kësaj dukurie dhe dënimi për këtë vepër të jetë shumë i rëndë.

Për fund, ish-futbollisti më i mirë në Kosovë e ka komentuar edhe garën e ngushtë për titull në Kosovë, teksa shpreson që Ballkani të shpallet kampion.

“Është mirë që për momentin po luftojnë tri skuadra për titull. Për mendimin tim, të tria skuadrat janë përafërisht të njejta nga cilësia edhe pse do të kisha dashur që kampion të jetë Ballkani pasi është klubi im i fëmijërisë”, përfundoi të mërkurën për FrontOnline Blerand Kurtishaj./FrontOnline/