Bisedimet mes Shteteve të Bashkuara dhe Iranit për programin bërthamor të Iranit kanë nisur në Muscat, kryeqyteti i Omanit.

Ministri i Jashtëm i Iranit, Abbas Araghchi, i tha televizionit shtetëror iranian se vendi i tij donte një “marrëveshje të drejtë”.

Presidenti i ShBA-së, Donald Trump, i tërhoqi Shtetet e Bashkuara nga një marrëveshje e mëparshme bërthamore e kohës së Obamës midis Iranit dhe fuqive botërore në vitin 2018 dhe ka thënë prej kohësh se do të bënte një marrëveshje “më të mirë”. Deri më tani Irani kishte refuzuar rinegocimin e marrëveshjes.

Nuk është e qartë nëse të dyja palët do të ulen në të njëjtën dhomë, por bisedimet shihen si një hap i parë i rëndësishëm për të përcaktuar nëse një marrëveshje mund të arrihet, me takimet e së shtunës që pritet të fokusohen në krijimin e një kuadri për negociatat.

Araghchi ka theksuar vazhdimisht se bisedimet indirekte janë më të mirat në këtë fazë.

I dërguari i Trumpit, Steve Witkoff, i cili drejton delegacionin amerikan, ka folur vetëm për takime ballë për ballë. Por çështja më e rëndësishme është se çfarë lloj marrëveshjeje do të pranonte secila palë.

Trump ka thënë vetëm se Irani nuk mund të ketë armë bërthamore.

Irani shpreson një marrëveshje për të kufizuar, por jo për të shpërbërë, programin e tij bërthamor në këmbim të lehtësimit të sanksioneve, shkruan BBC