Ndjeshëm janë rritur shpenzimet e luksit nga institucionet e Kosovës gjatë vitit 2023, krahasuar më vitet paraprake, 2022 dhe 2021.

Kryeministri Albin Kurti, si opozitar kritikonte, për luksin e tepruar kundërshtarët e tij politikë. Tash rritja e shpenzimeve të luksit për udhëtime zyrtare, karburante dhe shërbime telefonike, ka ndodhur në kohën kur ai vetë është në krye të Qeverisë.

Zyrtarët shtetërorë kanë shpenzuar deri tash në vitin 2023 (janar-shtator) gjithsej mbi 27 milionë euro për udhëtimet zyrtare, karburantet për vetura si dhe shërbimet telefonike, raporton Instituti për hulumtime Front, duke u bazuar në dokumentet zyrtare të Ministrisë së Financave.

Kjo shumë, e cila mund të rritet ende sepse nuk ka përfunduar viti kalendarik 2023, e tejkalon shumën e vitit 2022.

Vjet për të njëjtat arsye ishin harxhuar mbi 21 milionë euro. Kurse 13.5 milionë sosh, më 2021.

Shteti ka shpenzuar 6 milionë euro në luks më shumë gjatë 2023-ës sesa gjatë 2022-ës dhe mbi 13 milionë më shumë sesa gjatë 2021-ës.

Shpenzimet për “hava”

Zyrtarët shtetërorë kanë harxhuar 7.2 milionë euro për udhëtimet zyrtare jashtë vendit gjatë periudhës janar-shtator të 2023-ës.

Ministria e Financave pagoi për të njëjtën arsye 5.3 milionë më 2022-ën, raporton Instituti për hulumtime Front.

Më pak në vitin 2021, 2.5 milionë.

Mega shpenzimet për telefon

Zyrtarët shtetërorë kanë shpenzuar 3.5 milionë euro për shërbimet telefonike të realizuara gjatë 9 muajve të vitit 2023.

Pak mbi 3 milionë euro në 2022-ën.

Kurse 3.2 më 2021.

Nafta “djeg” paratë

Shteti i Kosovës ka harxhit 16.9 milionë euro në nëntë mujorin e vitit 2023 sa i përket derivateve për vetura.

Ata bënë kilometra më pak në vitin 2022.  Kjo u reflektua për shkak se harxhuan pos 16.2 milionë euro për karburante.

Dhe 11.4 milionë më 2021.

Ekonomistët shqetësohen për shpenzimet e larta të luksit, i quajnë të kota

Shqetësuese, por edhe të papërgjeshme i kanë cilësuar ekonomistët shpenzimet e larta për udhëtimet, karburantet dhe shërbimet e telefonisë.

Ish-Ministri i Financave, Haki Shatri i duket paradoksale  që shpenzimet e kësaj kategorie janë rritur, kurse investimet kapitale kanë ngec.

“Investimet kapitale kanë mbet pa u realizuar. Kjo është e papërgjegjshme, në kundërshtim me deklarimet parazgjedhore dhe situatën në të cilin po kalon vendi”.

Kritika pati edhe tek mosndihma qeveritare për një kategori tjetër.

“Nuk është shtuar asnjë cent tek kategoria e socialeve, kurse ka rritje tek kategoria e shpenzimeve për mallra dhe sherbime”, vlerësoi Shatri për Institutin për hulumtime Front.

Të njëjtën e thotë edhe ekonomisti Erzen Hyseni.

“Është mjaft shqetësuese për faktin se e dimë që shpenzimet e kapitalit kanë qenë mjaft të ulëta kështu që investimet e kapitalit ndikojnë në rritjen ekonomike kurse rritja e shpenzimeve te luksit thjesht janë shpenzime të kota të cilat nuk sjellin asnjë përfitim”, u shpreh Hyseni për Institutin për hulumtime Front.

Përndryshe, investimet kapitale në nivel vendi në periudhën janar-shtator 2023 kanë arritur vetëm 29%, ndonëse sipas planit do të duhej të arrinin rreth 70%.