Në Komunën e Junikut ka nisur sot asfaltimi i rrugës Junik–Restavic, një ndër projektet më të rëndësishme infrastrukturore për këtë zonë, që pritet të lehtësojë qarkullimin dhe të sjellë zhvillim të qëndrueshëm për banorët lokalë.

Kryetari i Komunës, Ruzhdi Shehu, ka reaguar me një mesazh të qartë ndaj kritikëve që, sipas tij, kujtohen për Junikun vetëm përmes statuseve nostalgjike dhe kujtimeve nga arkiva.

“Disa e matin zhvillimin me ‘kujtime nga arkiva’. Ne e masim me metra asfalt dhe investime konkrete që i shërbejnë qytetarëve sot, jo dje,” ka deklaruar Shehu.

Sipas tij, ky projekt nuk është as për fotografi elektorale e as për propagandë, por për të kthyer dinjitetin e munguar të një komuniteti që për shumë kohë ka qenë i lënë pas dore.

“Mund të flasësh gjatë për të kaluarën, por e ardhmja nuk ndërtohet me statuse; ajo ndërtohet me punë, angazhim dhe besim të qytetarëve,” tha ndër të tjera kryetari. Shehu falënderoi qytetarët për durimin dhe përkrahjen, duke shtuar me ironi se zhurma po mbetet pas, ndërsa rruga po merr formë.

Ky projekt pritet të përfundojë në afat të shpejtë dhe të ndikojë pozitivisht në lidhjen ndërmjet fshatrave dhe zhvillimin e potencialeve bujqësore e turistike të kësaj zone.

Postimi i plotë:

Të nderuar qytetarë,

Sot ka filluar asfaltimi i rrugës Junik–Restavic, një ndër segmentet më të rëndësishme për qarkullimin dhe zhvillimin e zonës sonë.

Disa e matin zhvillimin me statuse nostalgjike dhe “kujtime nga arkiva”. Ne e masim me metra asfalt, orë pune dhe investime konkrete që u shërbejnë qytetarëve sot, jo kujtimeve të dikujt dje.

Rruga Junik–Restavic po merr pamjen që e meriton, jo për të bërë foto elektorale, por për të përmirësuar jetën e njerëzve të kësaj ane, të cilët për shumë kohë janë harruar nga ata që sot kujtohen vetëm për “kritikë”.

Mund të flasësh gjatë për të kaluarën, por e ardhmja nuk ndërtohet me statuse; ajo ndërtohet me punë, angazhim dhe besim të qytetarëve!

Faleminderit qytetarëve për durimin dhe mbështetjen, si dhe të tjerëve për frymëzimin që po na japin çdo ditë!

Rruga po shtrohet, zhurma po mbetet pas.

R.Sh