Japonezët pohojnë se trendi i SUV-ve elektrikë të mëdhenj e të gjatë, të cilët bazohen në një platformë të ngathët, nuk është rruga përpara.

Honda ka zbuluar teknologjitë e gjeneratës së ardhshme që do të përdoren në një seri të re veturash elektrike të quajtur “Honda 0”.

Numri zero simbolizon një fillim krejt të ri, pasi Honda pretendon se do të fillojë nga e para. Gjithçka bëhet nën sloganin: më i hollë, më i lehtë dhe më i zgjuar.

Veturat e para të bazuara në strategjinë e re do të lansohen në tregun global nga viti 2026. Honda ka njoftuar tashmë dy modele prodhimi përmes dy koncepteve të quajtura Saloon dhe Space-Hub, dhe në janar ata do të shfaqin një koncept të tretë, më të përpunuar.

Veturat “Honda 0” do të bazohen në një platformë krejtësisht të re mekanike.

Platforma e re do të jetë “e ulët dhe e hollë” për të mundësuar prodhimin e veturave elektrike më efikase në aspektin aerodinamik, si dhe të atyre më tërheqëse.

Honda e sheh këtë platformë më të hollë si çelësin për tërheqjen e automjeteve të saj përpara, pasi trendi i SUV-ve të mëdhenj e të gjatë që maskojnë një platformë të ngathët të veturave elektrike thjesht nuk është rruga përpara. Të paktën kështu pretendon prodhuesi japonez.

Platforma e re do të ketë gjithashtu një bateri të re të hollë dhe një motor elektrik kompakt. Ulja e baterive gjithashtu ul qendrën e gravitetit dhe rrit sigurinë dhe komoditetin.

Honda gjithashtu njoftoi se do të prezantojë gjithsej shtatë modele në mbarë botën deri në vitin 2030. Kjo përfshin gjithçka, nga automjetet e vogla, të mesme dhe të mëdha. /Telegrafi/