Ministrja e Punëve të Jashtme dhe Diasporës Meliza Haradinaj-Stublla ka zhvilluar një bisedë telefonike me Ministrin e Punëve të Jashtme, Bashkëpunimit Ndërkombëtar dhe Diasporës së Gambisë Mamadou Tangara.
Shefja e diplomacisë kosovare e ka falënderuar shtetin e Gambisë për qëndrimin mbështetës dhe parimor rreth njohjes së Pavarësisë së Kosovës.
Haradinaj-Stublla ka biseduar me homologun Tangara edhe për thellimin e marrëdhënieve bilaterale në mes të Kosovës dhe Gambisë, sidomos në fushën e arsimit.
“Në një thirrje telefonike me Ministrin e Punëve të Jashtme, Bashkëpunimit Ndërkombëtar dhe Diasporës së Republikës së Gambias, Z. Mamadou Tangara, shpreha falënderimin e Kosovës për qëndrimin parimor të Republikës së Gambias rreth njohjes dhe pavarësisë së Republikës së Kosovës. Diskutuam për mundësitë e bashkëpunimit midis vendeve tona dhe thellimit të marrëdhënieve bilaterale sidomos për çështje të arsimit dhe fushave të tjera të interesit të përbashkët”, ka shkruar ajo.
