Ramush Haradinaj, kryetar i AAK-së, ka kritikuar ashpër qeverinë aktuale, duke akuzuar kryeministrin Albin Kurti për largimin e Kosovës nga aleatët ndërkombëtarë. Në një postim në Facebook, ish-kryeministri shprehu shqetësimin e tij për politikën e jashtme të vendit.
“Serbia do të jepte miliarda vetëm që ta largonte Kosovën nga mbrojtja amerikane dhe vendet e tjera aleate. Albini e largoi Kosovën pa pagesë fare,” shkroi Haradinaj. Ai shtoi se politika e Kurtit në Uashington po konsiderohet gjithnjë e më shumë si “gati armiqësore”, ndërsa Evropa po instalon një politikë “6 minus 1” në Ballkanin Perëndimor, ku Kosova është e përjashtuar nga çdo proces integrues.
Lideri i opozitës nuk kurseu as presidenten Vjosa Osmani, duke e quajtur “presidente koti” dhe duke e akuzuar për bashkëpërgjegjësi në veprimet e qeverisë. “Në çdo ndyrësirë të Kurtit, ti je në mes të saj,” u shpreh Haradinaj, duke kritikuar përpjekjen e presidentes për t’i shpëtuar përgjegjësisë. Sipas tij, situata aktuale ka izoluar Kosovën dhe ka forcuar agjendën serbe në rajon.
