Ministri i Punëve të Brendshme në detyrë, Xhelal Sveçla, bashkë me Drejtorin Ekzekutiv të Agjencisë së Menaxhimit të Emergjencave, Genc Metaj, kanë hapur zyrtarisht “Javën e AME-së”, një ngjarje që synon ndërgjegjësimin e qytetarëve për rëndësinë e reagimit dhe parandalimit në rastet e fatkeqësive natyrore dhe atyre të shkaktuara nga faktori njeri.

Gjatë ceremonisë, Sveçla theksoi rëndësinë e kësaj jave dhe përkushtimin e institucioneve për rritjen e kapaciteteve të Agjencisë së Menaxhimit të Emergjencave.

“Theksova mbështetjen që i kemi dhënë në vazhdimësi Agjencisë së Menaxhimit të Emergjencave në mënyrë që ajo të jetë e gatshme në çdo kohë të ballafaqohet me sfidat që vijnë nga fatkeqësitë natyrore dhe ato të shkaktuara nga faktori njeri”, deklaroi ministri në detyrë.

Sipas tij, gjatë kësaj jave do të zhvillohen aktivitete të shumta, me fokus të veçantë tek rinia, për të ngritur vetëdijen mbi rolin e tyre në përballjen me situata emergjente.

“Përgjatë kësaj jave do të ketë aktivitete të shumta të cilat synojnë të ndërgjegjësojnë qytetarët e veçanërisht të rininë tonë mbi rolin e tyre në parandalimin dhe reagimin në rastet e fatkeqësive natyrore dhe jo vetëm”, shtoi Sveçla.

Ai shprehu mirënjohje për stafin e AME-së për përkushtimin e tyre të vazhdueshëm.

“Falënderoj stafin e AME-së për organizimin e këtyre aktiviteteve dhe për punën e tyre të pandalshme me qëllim të mbrojtjes së aseteve tona natyrore, jetës dhe pronës së qytetarëve tanë”, përfundoi ai.