Pasi u përballën në finalen dramatike të Kupës së Kosovës, Kastrioti e Besa Famgasi do të përballen sërish të enjten (nesër) në gjysmëfinalen e parë të ‘Play-off-it’ në Superligën e Kosovës në hendboll.

Kjo sfidë do të zhvillohet nga ora 18:00 në palestrën “Bill Clinton”. Të dielën arena në Ferizaj ishte e stërmbushur me rreth 3 mijë shikues për finalen e Kupës, të cilën e fitoi Kastrioti. Por Besa ofroi ndeshje të bukur po ashtu, ndërsa finalja u vendos vetëm në minutat e fundit.

Interesante pritet të jetë edhe ndeshja e parë gjysmëfinale e ‘Play-off-it’, derisa shpresohet në numër të madh shikuesish.

Kastrioti e ka përfunduar stinorin e rregullt në pozitën e dytë, ndërsa Besa Famgas në pozitën e tretë.

Ndeshja e dytë gjysmëfinale është në fundjavë në Pejë. Skuadra që i shënon dy fitore, kualifikohet në finale. Ndeshja e tretë eventuale do të zhvillohet në Ferizaj./RTK