Zëvendëskryeministrja dhe Ministrja e Punëve të Jashtme dhe Diasporës, Donika Gërvalla, ka kërkuar përfundimin e mandatit të misionit të UNMIK-ut gjatë fjalimit të saj para Këshillit të Sigurimit të Kombeve të Bashkuara në Nju Jork, duke e akuzuar këtë mision për raportim të njëanshëm dhe të rrezikshëm për kredibilitetin ndërkombëtar.

Në një adresim të drejtpërdrejtë, Gërvalla ka ngritur shqetësimin për, siç tha ajo, veprimet destabilizuese të Serbisë ndaj Kosovës, dhe ka kërkuar që bashkësia ndërkombëtare të ndalë relativizimin e krimeve që, sipas saj, kërcënojnë paqen dhe stabilitetin në rajon.

Duke iu referuar sulmit të 24 shtatorit 2023 në Banjskë, ku mbeti i vrarë rreshteri Afrim Bunjaku, Ministrja theksoi se kjo ngjarje “nuk ishte thjesht një incident i izoluar”, por një akt i pastër agresioni.

“Ky ishte terrorizëm shtetëror, i planifikuar dhe i mbështetur nga Serbia. Ishte akt lufte,” deklaroi ajo, duke kritikuar ashpër mënyrën se si ky sulm është përshkruar në raportin e UNMIK-ut – si një “incident serioz sigurie”.

Gjatë fjalimit, Ministrja Gërvalla kritikoi ashpër raportimin e UNMIK-ut, duke e konsideruar si “të njëanshëm” dhe në “shpërputhje me realitetin në terren”. “UNMIK-u nuk po e dëmton më Kosovën, po e dëmton kredibilitetin e Kombeve të Bashkuara,” tha ajo, duke e krahasuar këtë mision me agjenci të tjera të OKB-së që, sipas saj, janë partnere të vërteta.

Ajo kërkoi që Serbia t’ia dorëzojë Kosovës Milan Radoiçiqin dhe pjesëtarët e tjerë të grupit paramilitar që morën pjesë në sulmin e Banjskës, si dhe të ndalojë mbështetjen shtetërore për strukturat ilegale dhe kriminale brenda territorit të Kosovës.

Në fund, Gërvalla deklaroi se Kosova është një demokraci funksionale, që respekton të drejtat e të gjitha komuniteteve, por theksoi se “pa drejtësi dhe pa emërtim të saktë të krimeve, paqja do të mbetet e brishtë.”