Shumica e ligave në Evropë kanë një pushim dimëror prej një ose dy javësh rreth Krishtlindjeve, kur ndeshjet ndalen dhe stërvitjet lehtësohen.

Por futbolli festiv ka qenë një traditë e palëkundur britanike për dekada. Kjo do të thotë se, po, shumica e futbollistëve profesionistë do të stërviten në Ditën e Krishtlindjeve.

“Kur i ke fëmijët aty duke luajtur me lodrat e tyre të reja dhe ti duhet të shkosh për stërvitje, kjo është një sakrificë e madhe. Nuk ka të bëjë me paratë – është thjesht natyra njerëzore,” tha ish-mesfushori i Sheffield United, Tottenham dhe Fulham, Michael Brown, për BBC.

Me ndeshje të planifikuara në kategoritë e larta në Angli, Skoci, Uells dhe Irlandë për “Boxing Day” (26 dhjetor) – si dhe në ligat më të ulëta angleze – një seancë stërvitjeje në Ditën e Krishtlindjeve është mundësia e fundit për trajnerët që të ndihmojnë lojtarët të ruajnë formën fizike dhe të punojnë mbi një plan loje.

Fotot festive që shfaqin lojtarë me kapele të Santa Claus-it dhe hundë dreri shpesh postohen në internet nga klubet që stërviten në Ditën e Krishtlindjeve.

Seancat stërvitore për ekipet që luajnë në shtëpi në “Boxing Day” zakonisht zhvillohen në mëngjes ose herët pasdite, përpara se lojtarët të shkojnë në shtëpi për të kaluar kohë me familjet e tyre më vonë gjatë ditës.

Por nëse një ekip luan jashtë fushe në Ditën e Box-it, gjërat bëhen më të ndërlikuara.

Klubet shpesh qëndrojnë në një hotel natën para ndeshjeve jashtë fushe, veçanërisht në rastet kur ndeshja fillon herët ose distanca për t’u udhëtuar është e madhe, që do të thotë se një udhëtim me autobus ose fluturim, i ndjekur nga një natë në hotel, është i zakonshëm.

Pavarësisht privilegjeve të dukshme, disa futbollistë e gjejnë të vështirë kohën e kaluar larg të dashurve në Ditën e Krishtlindjeve, siç pranon edhe Brown.

“Do të jem i sinqertë, [stërvitja në Krishtlindje] është një sfidë psikologjike për të mos ndier keqardhje për veten,” tha ai.

“Ndonjëherë mendon për të gjithë të tjerët që po kalojnë mirë, por duhet të mendosh se sa njerëz do të donin të ishin në vendin tënd. Duhet të kuptosh dhe të reflektosh mbi atë që po bën.”

Megjithatë, jo çdo lojtar duhet të paraqitet për punë në Ditën e Krishtlindjeve. Ekipet që nuk kanë ndeshje të planifikuara për “Boxing Day” shpesh i japin skuadrës pushim dhe stërviten më 26 dhjetor.

Këtë vit, sulmuesi i Arsenalit, Bukayo Saka, ishte një nga të privilegjuarit.

“Ne luajmë në shtëpi më 27, kështu që nuk kam nevojë të udhëtoj askund, kështu që është perfekte, nuk mund të kërkoja më shumë nga babadimri,” tha anglezi për BBC, përpara se të pësonte një dëmtim në muskujt e pasmë që do ta mbajë jashtë fushe për “shumë javë”.

“Do të jem në gjendje të ha një darkë Krishtlindjeje për herë të parë pas një kohe të gjatë, kështu që po e pres me padurim. Do ta kaloj me familjen time, kështu që do të jetë kënaqësi.