Franca dhe Spanja i janë bashkuar një nisme për të ndaluar shitjen e automjeteve me benzinë ​​dhe naftë pas vitit 2035 – pesë vjet më herët se plani i mëparshëm – si pjesë e përpjekjeve për të përshpejtuar kalimin në një ekonomi me karbon të ulët.

Këto dy vende bënë zotimin e tyre në bisedimet për klimën (COP27) në qytetin egjiptian Sharm el-Sheikh. Kështu, Franca dhe Spanja u gjendën në grupin e nënshkruesve të rinj të Deklaratës së Automjeteve Zero Emitime (ZEVD), e nisur në konferencën e vitit të kaluar në Glasgow.

Nënshkruesit – që përfshijnë shtete, komunitete lokale dhe kompani – janë zotuar për shitje 100 për qind të automjeteve me emetim zero deri në vitin 2035 në tregjet kryesore dhe deri në vitin 2040 në mbarë botën.

Numri i përgjithshëm i nënshkruesve të asaj deklarate tani është 214, krahasuar me 130 një vit më parë. Në të ardhmen, ZEVD do të mbikëqyret nga një grup i ri, Koalicioni i Përshpejtimit në Zero, qëllimi i të cilit është të ndihmojë nënshkruesit të zbatojnë angazhimet e tyre.

Politikëbërësit duan të reduktojnë ose eliminojnë emetimet e gazeve serrë nga makinat, kamionët dhe format e tjera të transportit. Aviacioni dhe transporti detar janë më të vështira për t’u dekarbonizuar, por teknologjia me emetim të ulët për automjetet më të vogla është krijuar mirë dhe po zgjerohet me shpejtësi.

Të dhënat e publikuara nga Bloomberg tregojnë se viti 2022 do të jetë një vit rekord për shitjet e automjeteve me emetim zero, me automjetet elektrike që përbëjnë 13.2 për qind të shitjeve totale në gjysmën e parë të vitit./FrontOnline/